Փնտրու՞մ եք հանգիստ զբոսանք բնության գրկում առանց հեռու ճանապարհորդելու: Երևանի կենտրոնից ընդամենը 15 րոպե մեքենայով՝ Երևանի բուսաբանական այգում, դուք կքայլեք այս հանգիստ և կենսաբազմազան արահետով։ Այն կատարյալ է կարճատև հանգստի համար: 

Երևանի բուսաբանական այգին հիմնադրվել է 1935 թվականին, 80 հա, գրեթե ծառազուրկ, կիսաանապատային տարածքում, 1200-1250 մետր բարձրության վրա։ 

Բուսաբանական այգին գիտական, բնապահպանական, կրթական և ռեկրեացիոն նշանակության հաստատություն է, որի հիմնական նպատակն է մոլորակի տարբեր բուսաշխարհագրական շրջաններից բարձր դեկորատիվ և տնտեսապես արժեքավոր բույսերի ներմուծումը, ցուցադրական գիտական կենդանի հավաքածուների ստեղծումը և նոր էկոլոգիական պայմաններում նրանց վարքագծի ուսումնասիրությունը և քաղաքների և բնակավայրերի կանաչապատման համար առավել հարմարեցված տեսակների կիրառումը։ 

Բուսաբանական այգիների ամենակարևոր և առաջնահերթ խնդիրներից է հայկական բուսական աշխարհի հազվագյուտ և վտանգված ներկայացուցիչների ex-situ պահպանումը։ Էկոկրթական գործունեությունը և մեր երկրի հարուստ կենսաբազմազանության մասին հանրային իրազեկության բարձրացումը Երևանի բուսաբանական այգու առաջնահերթ խնդիրներից է։ 

Ուսումնական արահետների և ցուցանակների ստեղծումը համաֆինանսավորվել է Հ.Հովնանյան ընտանիքի հիմնադրամի և «HIKEArmenia» ՀԿ-ի կողմից: