Վահագնի-Եղեգնուտ 3.5կմ երկարությամբ արահետը սկսվում է Վահագնի գյուղի կենտրոնից։ Սա Ձորագյուղից դեպի Վահագնի եկող արահետի շարունակությունն է։ Քայլքի ժամանակ անցնելու եք ժայռոտ կածանով, ասֆալտապատ ճանապարհի մի քանի մասերով և անտառապատ հատվածներով։ Տեսարանները կբացվեն դեպի Փամբակ գետը, իսկ դեպի Եղեգնուտ գնալիս կտեսնեք հովտում պատսպարված բնակավայրերը։ 

Վահագնի գյուղի կենտրոնում՝ արահետի մեկնակետի և ջրի աղբյուրի մոտից, արահետը գյուղի ասֆալտապատ ճանապարհով մի փոքր իջնում է դեպի հովիտը, ապա անցնում նոսր անտառներով և քարքարոտ կածանով։ Այս առաջին հատվածում մոտ 1.5մետր վայրէջք եք կատարում, ի վերջո հասնելով միջպետական մայրուղուն։ Մայրուղու մյուս կողմում կա սննդի կետ, իսկ կողքին գտնվող կամուրջի մոտ տեղադրված են արահետի ցուցանակները։ Այստեղից արահետը 2 կիլոմետր ձգվում է վերև՝ մոտ 125 մետր հարաբերական բարձրությամբ և ոլորապտույտ անցնում անտառների միջով։ 

Դեպի Եղեգնուտ բարձրանալիս արահետը շատ մոտ է անցնում հիմնական ճանապարհին, իսկ արդեն գյուղի մոտ միանում է փողոցին և ավարտվում գյուղի կենտրոնում։ Այս հատվածում կա ցայտաղբյուր և մի քանի մթերային խանութներ։ 

Ջրի աղբյուրներ/ տեղեկություններ.
Ցայտաղբյուրներ կան Վահագնի գյուղի կենտրոնում, Եղեգնուտ գյուղ մտնելիս փողոցի վրա, և արահետի վերջում՝ Եղեգնուտի կենտրոնում։