Եղեգնուտից դեպի Դեբեդ գյուղ ձգվող երթուղին թեթև քայլք է 5 կիլոմետր երկարությամբ։ Հայաստանի ազգային արահետի այս հատվածը թույլ է տալիս ծանոթանալ գյուղական կյանքին՝ անցնելով երկու գյուղերի միջով։ Եղեգնուտում արահետի մեկնարկային ցուցանակը գտնվում է գյուղի կենտրոնում, որտեղ կգտնեք մթերային խանութ և ցայտաղբյուր։ Այստեղից մի փոքր հիմնական փողոցով քայլելուց հետո, արահետը թեքվում է դեպի գյուղի գրունտային ճանապարհները։ Հին տնակների, կղմինդրե տանիքների և պտղատու այգիների միջով արահետը շուտով դուրս է գալիս դեպի անտառային հատվածներ։ Երթուղին շրջանցում է սարը լանջի վերին հատվածով, որը քայլողների առջև հիանալի տեսարաններ է բացում դեպի շրջակա հովիտները։ 

Սարահարթը շրջանցելուց հետո՝ դեպի Դեբետ գյուղ իջնելու ճանապարհին դեպի ձախ, կարող եք տեսնել ՔՈԱՖ ՍՄԱՐԹ կրթական կենտրոնի նորարական շենքը։ Նոսրանտառներ և թփուտների միջով կշարունակեք դեպի Դեբետ։ Իջնելու ընթացքում արահետը մի պահ կմիանա միջգյուղական ասֆալտապատ նեղ ճանապարհին, ապա նորից կանցնի նեղ կածաններով։ Դեբետ գյուղը հովտի մեջ տեղակայված, գեղատեսիլ բնությամբ բնակատեղի է, որտեղ այժմ կան գիշերակացի և հանգստի կազմակերպման բավականին տարբերակներ։ Այդ հանգստյան գոտիները կարող եք տեսնել գյուղի կենտրոն հասնելուց առաջ։ Անցնելով փոքրիկ վտակի վրայի կամուրջը՝ արահետը կավարտվի Դեբետի գլխավոր կանգառի մոտ։ Այստեղ կարող եք հեշտությամբ գտնել գիշերակացի համար հարմարավետ հյուրատուն, կամ շարունակել երթուղին դեպի սարերի գլխին ծվարած Չկալով գյուղ։