Գյուղից գյուղ անցնող ազգային արահետի յուրահատուկ քայլքերից մեկը սկսվում է Դեբետ գյուղից։ Դեբետ գյուղից դեպի Չկալով արահետը 3.6 կիլոմետր է։ Քայլքը կսկսեք գյուղի կենտրոնական կանգառի մոտից: Դեբետը մոտ 1000 մետր բարձրության վրա է գտնվում, և մինչև Չկալով հասնելը աստիճանաբար կհաղթահարեք մոտ 300 մետր հարաբերական բարձրություն։ Գյուղի կենտրոնով բարձրանալիս կարող եք տեսնել ակտիվորեն փոփոխվող ենթակառուցվածները, դպրոցի շինարարությունը, հյուրընկալման կետերը։ Այստեղից արահետը գնում է գետի հունով՝ անցնելով մեծ քարերի վրայով։ Վերջին տան ներքևում՝ արահետի ձախ կողմում կգտնեք ձեռակերտ մետաղական ջրաղաց, որը այժմ չի գործում։  

Արահետը անցնում է մարգագետինների և անտառուտների միջով, անընդհատ գալարվելով գետի շուրջ։ Այստեղից կշարունակեք դեպի վերին հանդերը և վայրի նշենիների կողքի ոլոր ճանապարհով կհասնեք Չկալով գյուղի մուտքին։ Այստեղից ցուցանակները կտանեն դեպի գյուղի կենտրոն, որտեղ կգտնեք 19-րդ դարի բազիլիկ եկեղեցին և մի քանի միջնադարյան խաչքարեր։ 

 
Ջրի աղբյուրներ/ տեղեկություններ.
Ջրի աղբյուր կհանդիպեք Դեբետ գյուղի կենտրոնում, արահետից մոտ 150 մետր դեպի Փամբակ գետը, ուռենու տակ։ Մյուս հուշաղբուրը կտեսնեք Դեբետից դուրս գալիս, վերջին տան հարևանությամբ։ Չկալով գյուղի եկեղեցու բակում նույնպես կա հուշաղբյուր։ 

Նշումներ՝
Դեպի Չկալով բարձրացող վերջին վերելքից առաջ՝ անտառային հատվածում նշագծումները տանում են երկու ուղղությամբ, սակայն երկու դեպքում էլ հայտվելու եք նույն լայն արահետի վրա։