Դսեղ-Քարինջ արահետը շարունակում է Չկալով-Դսեղ երթուղին՝ ձգվելով 12.4 կիլոմետր։ Քայլքի ընթացքում վերուվար կանեք մոտ 400 կիլոմետր հարաբերական բարձրություններ, քանի որ երկու գյուղերը գտնվում են սարահարթի հակառակ կողմերում և բաժանված են Մարցագետի ձորով։ Երթուղին ներառում է դաշտերի, անտառների և ավելի կտրուկ ժայռոտ հատվածներ։ Այս տարբերությունները թույլ են տալիս անընդհատ նոր տեսարաններ վայելել և ֆիզիկապես չհոգնել։ 

Արահետի մեկնարկը Դսեղի կենտրոնական հրապարակից է։ Այն անցնում է հրապարակի քանդակաշատ այգու մոտով, ապա իջնում դեպի Հովհաննես Թումանյանի տուն-թանգարանի մոտ, որի դիմաց տեղակայված է գյուղի հին եկեղեցին։ Գյուղամիջի նեղլիկ փողոցներով արահետը շարունակվում է դեպի Դսեղի շուրջ գտնվող դաշտերն ու արոտավայրերը։ Այս հատվածից բացվում են շատ տպավորիչ տեսարաններ դեպի Դեբեդի կիրճը։ 

Մոտ 4 կիլոմետր հարթավայրով քայլելուց հետո կհասնեք անտառապատ հատվածներով իջնող արահետին, որը նաև հայտնի է Գիքորի արահետ անվանմամբ։ Այս հատվածից կիջնեք մոտ 2 կիլոմետր անտառի միջով՝ ճանապարհին անցնելով հին մատուռի ավերակների, խաչքարերի, տապանաքարերի, ձիթհանի մեծ սալերի և Գիքորի աղբյուրի կողքով։ 6-րդ կիլոմետրից հետո արահետը սկսում է բարձրանալ։ Արահետը կանցնի կամրջի վրայով, և կսկսի ոլորաններով բարձրանալ դեպի Քարինջ գյուղը։ Գյուղը տեղադրված է Դժարսարի լանջերին, այս մասերը ավելի զառիվայր են ու ունեն կտրուկ հատվածներ։ Քայլքը կավարտեք Քարինջի կենտրոնական խաչմերուկի մոտ։ Այստեղից կարող եք շարունակել դեպի հարևան Մարց գյուղ, կամ հաջորդ օրը բարձրանալ դեպի Դժարսարի գագաթը։ 

Ջրի աղբյուրներ/ տեղեկություններ.
Ջրի աղբյուրներ կգտնեք Դսեղի և Քարինջի կենտրոնում։ Թարմացրեք ջրի պաշարը այս կետերում, քանի որ արահետի ընթացքում հանդիպող աղբյուրները կարող են չորացած լինել։ 

Նշումներ՝
Ամռան ամսիներին արահետի բուսականությունը կարող է շատ բարձրացած լինել և կածանները որոշ տեղերում կարող են բավականին փակված լինել։