Այս արահետը կապում է Շամուտ գյուղը Աթանի հետ։ Երթուղու երկարությունը 9.1 կմ է։ Շամուտը շրջապատված է անտառապատ լեռներով, և իր անունը ստացել է այնտեղ տարածված սոճիների շնորհիվ, որոնց տեղացիների լեզվով «շամ» են ասում։ Բարձր սոճիներով պարսպապատ բլրակը գյուղի գերեզմանատունն է, որից մի քանի քայլ ներքև կգտնեք սառնորակ աղբյուր և կհայտնվեք դեպի Աթան գնացող արահետի վրա։ 

Շամուտ գյուղից դեպի Աթան արահետի բարդությունը մոտ 400 մետր հարաբերական բարձրություն հաղթահարելու մեջ է, սակայն քայլքի ընթացքում բացվում են տեսարաններ դեպի ողջ Մոտկոր աշխարհը և շրջակա լեռնազանգվածներ։ Շամուտից դուրս գալիս կանցնեք երեք ջրի աղբյուրների և կիսավեր գոմերի կողքով։ Մոտ 3-րդ կիլոմետրին՝ ամենակտրուկ վերելքից առաջ, կտեսնեք պարսպապատ տաղավար ջրի աղբյուրով։ Այս հատվածը հարմար է նաև վրանային գիշերակացի համար։ Արահետը բարձրանում է դեպի լեռնաշղթայի կատարը և այդպես շարունակվում մինչև անտառներ վայրէջքը։ Մինչև Աթան հասնելը՝ գետի կողքին, ևս մեկ ջրի աղբյուր կա երկու տաղավարներով։ Վերջին կտրուկ վերելքը ձեր առջև կբացի դեպի Աթան համայնապատկերը և արահետով կիջնեք դեպի բնակատեղի։ Արահետը հարմար է նաև լեռնային հեծանիվով  անցնելու համար։ 

Աթանից կարող եք արահետը շարունակել դեպի Աղբուղա կամ իջնել դեպի նորակառույց ճանապարհը, որը կտանի ձեզ մինչև Վանաձոր-Ալավերդի Մ6 մայրուղի։