Հաղարծնի վանքից դեպի Դիլիջան գնացող արահետը 19 կիլոմետր է։ Երթուղին հատկապես հետաքրքիր կլինի լեռնային վերելքներ նախընտրողների համար։ Արահետի մեկնարկը սկսվում է Հաղարծնի միջնադարյան վանքի արևմտյան մասից։ Այս հատվածի բարձրությունը ծովի մակարդակից մոտ 1400 մետր է։ Մի փոքր քայլելով ներքև դեպի Հաղարծին գետը, արահետը կսկսի աստիճանաբար բարձրանալ մոտ 6 կիլոմետր։ Այս ընթացքում կհաղթահարեք մի քանի կտրուկ վերելքներ, փոքրիկ վտակների անցումներ, սաղարթախիտ թփուտներ, կհանդիպեք այլ կածանների և ճանապարհների, որոնք գյուղացիները գործածում են անտառի մեջ երթևեկելիս։ 

Մոտ 6-րդ կիլոմետրի վրա կհայտվեք լեռնազանգվածի կատարին՝ 2000 մետր բարձրության վրա։ Այստեղ կարող եք մի փոքր հանգստանալ՝ վայելելով դեպի շրջակա լեռներն ու անտառները բացվող հիանալի տեսարանը։ Սարահարթն անցնելուց հետո արահետը նորից կխորանա դեպի սաղարթախիտ անտառները՝ աստիճանաբար իջնելով և մի քանի կտրուկ վայրէջքներ անցնելով։ Որոշ հատվածներում ծառերը կնոսրանան և տեսանելի կդառնա Դիլիջան քաղաքը։ Մի քանի ոլորապտույտ կածաններից հետո դուրս կգաք մեքենայի ճանապարհի վրա, որից հետո կիջնեք դեպի հիմնական մայրուղի։ Ճանապարհը զգուշությամբ անցնելուց հետո արահետը կամրջի վրայով շարունակվում է քաղաքի ծայրամասերի միջով՝ Աղստև գետի հարևանությամբ։ Երթուղին ավարտվում է Դիլիջան քաղաքի կենտրոնում, որտեղ կգտնեք մթերային խանութներ, սուպերմարկետ, դեղատուն, հյուրատներ և սննդի կետեր։ 

 
Ջրի աղբյուրներ / Տեղեկություննր

Հաղարծնի վանքի դիմաց՝ հացի փուռի կողքին կա ջրի ցայտաղբյուր, ևս մեկը կգտնեք վանքի ետևում՝ քայլքի մեկնակետում։ Արահետի ուղիղ կեսին կա հանքային ջրի աղբյուր։ Ցայտաղբյուրներ կան նաև Դիլիջան քաղաքի ներսում։ 

Նշումներ՝

Արահետը մի քանի տեղերում հատվում է այլ ճանապարհների հետ, որոնք օգտագործում են գյուղացիների կողմից կենդանիներ կամ փայտ տեղափոխելու համար։ Պետք է ուշադիր լինել ու հետևել արահետի նշաններին։ Անձրևային օրերին գետին մոտ գտնվող կամ մեքենայի անցած հատվածները կարող են շատ ցեխոտ լինել։ Ամռան ամիսներին խիտ թփուտների պատճառով արահետները մի քանի կետում կարող են անցնելու համար շատ նեղ լինել։